حامل في الاسبوع 11 وعندي ألم الدورة هل هذا طبيعي وآخذ فيتامينات وكالسيوم
أنا حامل في الاسبوع 11 وعندي ألم الدورة هل هذا طبيعي وآخذ فيتامينات وكالسيوم واحاول اعبي النقص لكن اكلي بس بسيط بسبب الغثيان والقيء صرت استفرغ لي كم يوم
والنوم احس اتعب منه وما اشبع من النوم جسمي تعبان واكلي مستحيل اكل شي مطبوخ معتمدة على الفاكهه الزبادي الكورنفلكس هذا اكلي اذا اكلت شيء ثاني اتعب حيل من معدتي والانتفاخ والقيء اختباراتي الاحد والحين خفت من هالألم هل طبيعي او كيف؟
نصائح عن حامل في الاسبوع 11 وعندي ألم الدورة هل هذا طبيعي وآخذ فيتامينات وكالسيوم
ج/١ لما تزوري طبيبتك اسأليها اذا الألم ما معه نزول دم بتخيل ما في خوف حاولي تتمددي وترتاحي لحد موعدك مع الدكتوره اشربي ماء في الاوقات اللي ما بيجيك غثيان فيها حاولي تاكلي اكل مطبوخ ولكن بارد ممكن تتقبله معدتك لانه ما بتشمي ريحة الاكل.
ج/٢ يظل مغص مثل الدورة او وجع الظهر اثناء الفترة الأولى من الحمل طبيعي جداً اذا كان محتمل ومايصاحبه اي دم.
ج/٣ الشهور الأولى جداً صعبه .. يارب تعدي وترجعي لصحتك وعافيتك..أنا بحملي الأول وهذا الحمل كمان تجيني آلام قويه وجسمي يتكسر وما اقدر اقوم ..اتوقع طبيعي لكن من الافضل انك تطمني وتستشيري دكتورتك .. اذا ما تقدري تروحي عندها ممكن تتصلي على المستشفى تليفون ويحولوك للدكتوره وتشرحي لها ظروفك وهي بتقول لك اذا لازم تراجعيها او لا.
بالنسبه للغثيان.. الله يعينك ويصبرك .. أنا بحملي الأول والثاني ما قدرت آكل لقمه اكل مطبوخ .. صار وزني 42 من قلة الأكل.. لكن بعد 3 اشهر الحمدلله تحسن الوضع .. حاولي قد ماتقدري ولا تضغطي على نفسك زياده لان لو غصبتي نفسك على الأكل بتستفرغي .. وكلها ايام وتعدي ان شاء الله.
